به‌به‌ڕێوه‌چوونی رێ و ره‌سمی ١١ی خه‌رمانان ساڵرۆژی دامه‌زرانی حیزبی كومونیستی ئێران

ئێواره‌ی رۆژی سێشه‌ممه‌ ١٠ی خه‌رمانان رێ و ره‌سمێك بۆ رێزگرتن له‌ بیست و شه‌شه‌مین ساڵرۆژی پێكهاتنی حیزبی كومونیستی ئێران به‌ به‌شداری پێشمه‌رگه‌كانی كۆمه‌ڵه‌، ئه‌ندامانی حیزبی كومونیستی ئێران و دۆستان و لایه‌نگرانی حیزب له‌ كوردستانی عێراق له‌ مقه‌ڕی ناوه‌ندی كۆمه‌ڵه‌ له‌ نیزیك شاری سوله‌یمانیه‌ به‌ڕێوه‌چوو. رێوره‌سمه‌كه‌ به‌ سروودی ئه‌نترناسیۆناڵ سروودی هاوپشتی جیهانی چینی كرێكار له‌ لایه‌ن كۆڕی سروودی كۆمه‌ڵه‌ و ده‌قیقه‌یه‌ك بێده‌نگی بۆ یادی ئازیز و خۆشه‌ویستی سه‌رجه‌م گیانبه‌ختكردوانی رێبازی ئازادی و سوسیالیزم ده‌ستی پێكرد. له‌ درێژه‌ی مه‌رسیمه‌كه‌دا هاوڕێ ئیبراهیمی عه‌لیزاده‌ ئه‌ندامی كومیته‌ی ئیجڕایی حیزبی كومونیستی ئێران له‌ قسه‌وباسێكداسه‌باره‌ت‌ پرۆسه‌ی شكڵ گرتن و پێكهاتنی حیزب، بنه‌مای به‌رنامه‌ و هه‌ڵوێستی سیاسی كورت ماوه‌ و ئیستراتژی حیزب، هه‌ڵوێسته‌كانی حیزب سه‌باره‌ت به‌ گۆڕانكاریه‌كانی جیهان و ناوچه‌كه‌، سه‌رهه‌ڵدان و هۆكاره‌كانی جیایی و دابڕان له‌ حیزب و به‌شێك له‌ خاڵه‌ لاواز و به‌هێزه‌كانی حیزبی كومونیستی ئێرانی بۆ به‌شداران شیكرده‌وه‌. له‌درێژه‌ی رێ و ره‌سمه‌كه‌دا هاوڕێ پویا محه‌ممه‌دی ئه‌ندامی كومیته‌ی ناوه‌ندی حیزبی كومونیستی ئێران له‌ وتارێكدا باسی له‌ به‌شێك له‌ مێژووی پڕله‌ هه‌ورازو نشێوی حیزب كرد. خوێندنه‌وه‌ی شێعری شۆڕشگێڕانه‌ و سروود به‌شێكی تری به‌رنامه‌كانی مه‌راسیمه‌كه‌ی به‌ خۆی ته‌رخان كردبوو. هه‌روه‌ها دوایین به‌شی رێ و ره‌سمه‌كه‌ به‌ شادی و خۆشی به‌شداربوان هه‌تا دره‌نگانێ درێژه‌ی كێشا و كۆتایی پێهات.

٭٭٭

پێشره‌و ژماره‌ ٢٧١